NUUSBRIEF – 1STE KWARTAAL 2019

Home / Blog / NUUSBRIEF – 1STE KWARTAAL 2019
NUUSBRIEF – 1STE KWARTAAL 2019

Bietjie meer as drie maande gelede het beleggers in ‘n afgrond afgekyk. Daar was voortslepende ekonomiese en politieke probleme waarvoor daar skynbaar geen antwoorde was nie.

 

  1. Die Chinese ekonomie het tydens 2018 verlangsaam tot by die swakste groeisyfer in meer as drie dekades.
  2. ‘n Handelsoorlog tussen die VSA en China het gedreig om te eskaleer.
  3. Die Britte en die burokrate in Brussels kon nie tot ‘n vergelyk kom nie.
  4. Die Federale Reserwe het afgestuur op ‘n beleidsfout deur rentekoerse aan te hou verhoog in die gesig van swakker toestande en inflasie wat redelik binne perke is.

 

Teen vroeg 2019 was die skade van hierdie onsekerheid skerp sigbaar in ekonomiese data wat ‘n baie droewige prentjie van die wêreld-ekonomie geverf het. Tog het aandeelmarkte skerp begin herstel tydens die volgende 3 maande, omdat baie van hierdie onsekerhede sigbare, en meestal positiewe oplossings begin toon het.

Die Federale Reserwe het retireer, die handelsoorlog wil verbaas met ‘n ooreenkoms en die Britse Parlement het die moontlikheid van ‘n harde Brexit uitgestem. Die Chinese het die krane alreeds in die tweede helfte van 2018 begin oopmaak in die vorm van krediet beskikbaarheid, belastingkortings en weereens fondse vir infrastruktuur besteding.

 

Die MSCI-wêreldindeks het in die 1ste kwartaal gevolglik 11.8% versterk (in Dollar terme). Daarteenoor het Capicraft se gemiddelde buitelandse portefeulje 13.2% in Dollar terme gestyg.  Die Algehele Indeks het met 7% versterk gedurende die kwartaal, maar dit was hoofsaaklik gedryf deur multinasionale maatskappye soos Naspers, British American Tobacco en BHP Billiton wat gebaat het by bogenoemde internasionale gebeure. Die lopie in hulpbron-aandele is veral sterk gewees, gedryf deur die Chinese inspuitings en ondersteun deur laer rentekoerse in die VSA. Behalwe vir dit, was Vale, die Braziliaanse ystererts reus, deur ‘n reuse sluk-dam ongeluk getref. Die veiligheids- en voorkomings-gedrewe produksiestakings wat daarna gevolg het, het sowat 5% van die wêreld se see-vervoerde ystererts van die mark afgehaal. Baie van die hulpbronsektor se lopie word dus gebaseer op tydelike faktore (Vale) en sikliese faktore (rentekoerse en Chinese inspuitings). Ons is dus skepties oor die volhoubaarheid van die lopie en bly versigtig vir die sektor weens die afhanklikheid van yster en ander basis metaal pryse tot die Chinese ekonomie. 

Behalwe vir bogenoemde handjievol swaargewig-presteerders, was sentiment op die JSE nog baie swak gewees, en het in verskeie sektore selfs verder verswak. Die JSE gelyk-geweegde indeks, wat ‘n gelyke gewig aan elke top 40 aandeel gee, was 0.6% laer vir die kwartaal. Dit is dalk ‘n beter barometer vir plaaslike sentiment en ook meer in lyn met Capicraft se plaaslike portefeuljes wat gemiddeld 0.5% teruggesak het gedurende die kwartaal.  Alhoewel ons blootstelling aan “SA Inc” sektore soos kleinhandel (-15.5%) beperk was, en landmyne soos Tongaat (-60%), Omnia (-42%) en Aspen (-31%) misgetrap het, was ons blootstelling aan klein-kapitalisasie aandele steeds ‘n doring in die vlees. Die klein-kapitalisasie sektor het 4.2% verloor tydens die kwartaal. Terwyl baie van die kleiner maatskappye op ons beurs sukkel in die huidige omgewing, glo ons nie die onlangse prys swakte is toe te skryf aan fundamentele faktore nie, maar eerder aan swak plaaslike sentiment wat vererger word deur die beperkte verhandelbaarheid (likiditeit) van die aandele. Vir ons klein-kapitalisasie aandele in die portefeulje om te herstel moet een van drie goed gebeur:

 

  1. Sentiment op die JSE en die SA ekonomie herstel as geheel en klein-kapitalisasie volg met groot bewegings vanaf baie laer waardasies – hiervoor hou ons nie ons asems op nie.
  2. Die besigheidsprestasie van individuele klein-kapitalisasie maatskappye dryf daardie spesifieke aandele hoër te midde van ‘n swak omgewing – hiervan sien ons alreeds gebeur, maar dit is geisoleerde gevalle en die stygings is beperk.
  3. Korporatiewe aksie dryf aandeelpryse hoër in die vorm van oornames, denoterings en aandeel terugkope – waardasie vlakke maak die omgewing ryp hiervoor en ons sien alreeds hiervan gebeur.

 

Ondanks die swak plaaslike prestasie is meeste van Capicraft se portefeuljes – ‘n kombinasie van plaaslike en buitelandse portefeuljes – gemiddeld 6.4% sterker gedurende die kwartaal.

 

Ons hou nie ons asems op vir ‘n herstel in SA sentiment na die verkiesing in Mei-maand nie, maar enige beweging in die regte rigting met betrekking tot politieke retoriek en die bestuur van die land kan groot wonders op die plaaslike beurs verrig waar baie sektore op lae waardasies verhandel. Die Rand kan ook betreklik vinnig versterk, veral met VSA rentekoerse wat op hou is en hulpbronpryse wat versterk het. Noem dit ‘n Ramaphoria 2.0. Alhoewel dit sekere gedeeltes van ons portefeulje skerp sal laat styg, sal dit as geheel op die korttermyn die Rand waarde van die portefeulje onderdruk omdat ons sterk buitelandse blootstelling het.  Vanweë die politieke diskoers dink ons egter dat konkrete beleidsveranderings en struktureule hervorming lippediens sal ontvang, maar in werklikheid nooit regtig hoog op die agenda gaan wees nie.  Daarom beperk ons steeds ons blootstelling aan plaaslike maatskappye ondanks die moontlikheid dat hulle op die korttermyn kan uitpresteer. Omdat ons egter nie die toekoms kan voorspel nie, sal ons nooit heeltemal van ons plaaslike bates vervreem raak nie, maar steeds kwaliteit plaaslike bates besit en bykoop waar die regte geleentheid homself voordoen. 

 

As daar een ding is wat ons die laaste drie of wat jaar geleer het, is dit die belangrikheid van portefeulje konstruksie. Ons hoor gereeld ons moet diversifiseer. Ja, maar gegewe die beleggingsheelal voor my, hoeveel besit ek van wat? Portefeulje konstruksie is die kuns om die regte hoeveelheid (blootstelling) aan ‘n instrument te gee gegewe sy (1) risiko’s, (2) potensiaal en (3) sy wisselwerking met ander instrumente in die portefeulje. In sommige aspekte het ons dit reg gekry, deur byvoorbeeld die laaste paar jaar ‘n baie swaar blootstelling aan die buiteland, veral die VSA te gee. In ander het ons weer die klits kwyt geraak deur heeltemal te veel blootstelling aan individuele aandele te gee, waar die potensiaal dalk groot was, maar waar die risiko’s nooit só groot blootstelling sou regverdig nie.

 

Dit is daarom ‘n kuns wat verfyn moet word. ‘n Kuns wat ons geleer het ondersteun kan word deur ‘n sterk wiskundige raamwerk. Verfyning vind dan gewoonlik ook nie plaas wanneer alles in jou guns speel nie. Dit gebeur wanneer die markte nie wil saamwerk nie en jou beste idees nie wil uitspeel nie. Soos CS Lewis sê “Experience: that most brutal of teachers. But you learn, my God do you learn.”

 

Jou Beleggingsvennoot,

Drikus Combrinck

 

Om die Nuusbrief in PDF weergawe af te laai, klik op die skakel:

Nuusbrief – 1ste Kwartaal 2019

 

 

 

 

 

 

 

 

 

 

 

 

 

 

Leave a Reply

Your email address will not be published. Required fields are marked *